#انت_كما_ترى_نفسك_بقلم_هلاغرابلي....
الجزء الاول:
لا يوجد امراة قبيحة ...يوجد فقط امراة كسولة(مقتبس)
الجمال الخارجي هو نعمة من عند ربنا ،و متفاوت بالنسب و الاذواق عند كل انسان و حتى ممكن يلي تشوفو عينك جميل ،عين غيرك تشوفو عادي او حتى قبيح ،بس بحالتي انا كنت شايفة حالي ما بقرب للجمال بشي ابدا ،بعيدة عن الجمال بعد السما عن الارض ،كانت مواصفاتي بتأهلني لكون ملكة جمال القباحة بامتياز ،ملامح وجهي غير متناسقة ابدا انف كبير بحجم البادنجانة و تم كبير و شفايف غليظة و عيون صغار متل الصينية و شعري مجعد وما عندي خدود و حتى جسمي كان غير متناسق مع بعضه قصيرة كتير و ناصحة من منطقة الورك ونحيفة من منطقة الخصر ،ما بس هيك كنت حاطة نظارات طبية و تقويم اسنان و فوق كل هالشي كنت بقرط بحرف السين ،يعني حتى مرة حبيت اعمل اختبار على الفيسبوك لشوف نسبة جمالي ،صار يعطيني خطأ في تحميل النتيجة ،يعني حتى الفيس جمد من بشاعتي و خجل يعطيني نسبة ،بس كانت بشاعتي ما مأثرة على نفسيتي ابدا،يعني وحدة بمكاني بتكتئب وبتصير عندها عقد نفسية و عقدة نقص و خاصة وقت كل بنات جيلها عم يحبو و ينحبو الا هي ما حدا ما عم يطلع فيا ،حاولت كتير خبي انزعاجي من شكلي و لحمدلله كان عندي رفقات كتير لا تعد و لا تحصى بالجامعة ،اولا لانو كانت شخصيتي مرحة و دمي خفيف و على طول اضحك و اخدة الدنيا ببساطة و يا جبل ما يهزك ريح و ثانيا لانو اي بنت بالجامعة رح تمشي جنبي رح تبين ملكة جمال و تزيد ثقتا بحالا لهيك كانت البنات على طول ملتفة حولي ،و كنت كمان من المتفوقات على دفعتي يعني صح كنت محرومة من الجمال بس بالمقابل كنت اجتهد و اتعب على حالي لانجح و اتخرج و حصل معدل ممتاز حتى عوض نقص جمالي بنجاح حياتي المهنية مستقبلا......#بقلم_هلاغرابلي
بقولو جمال البنت هو جواز سفرها بس للاسف انا ما كان عندي هالجواز و الصعوبة بلشت معي بعد ما تخرجت من الجامعة و بلشت دور على وظيفة ،وين ما روح اقدم على وظيفة و اعمل مقابلة عمل ،انرفض فورا ،و هالشي خلاني فوت بحالة اكتئاب ،حسيت الدنيا كلها ضدي ،يعني لا جمال و لا حظ و كل دراستي و تعبي و تفوقي راح على الفاضي اذا ما حدا قبل يوظفني و خاصة بكل الوظائف حاطين على راس قائمة شروط القبول الشكل اللائق ، كنت انقهر كتير وقت اسمع كل رفقاتي توظفو و حتى يلي كان معدلن اقل من معدلي بكتير و انا بعدني قاعدة و حتى في رفقات الي تزوجو و صار عندن اولاد و انا ما طلعت لا بشغل و لا بعريس،ما كنت احسدن لا كنت ازعل على قلة حظي و نصيبي من هالدنيا و ارجع قول بجوز الله مخبيلي الافضل ،صار عمري 29سنة و بعدني بمكاني و ما تقدمت خطوة لقدام ......
الجزء التاني:
ايمان: في مسابقة ،ما رح تروحي تقدمي عليا..
جميلة: لا ما رح روح ،حظي و بعرفو ...
ايمان: ولله انت ما بشعة هالقد متل ما انتي شايفة حالك ،انا بشوفك جذابة ...
جميلة :هههههههه لانك رفيقتي و بتحبيني لهيك بتشوفيني جذابة بث انا غير هيك و لو كنت حلوة ما كنتي شفتيني قاعدة عم كش دبان لهلأ ، و ناقعة شهادتي و عم اشرب ميتا و فوق منها اثمي جميلة ما بعرف ليش اهلي ثموني هالاثم يمكن على قولة المتل لكل مثمى من اثمه نصيب....
ايمان:لا مو بس لانك رفيقتي ،العين اذواق و انا هيك جمال بيعجبني ...
جميلة:حاج تواثيني ،انا ما بحياتي كانت فارقة معي انو بشعة و عايشة و مطنشة هالموضوع بث ما توقعت انو ادرث و اتعب على حالي و بالاخير اقعد بالبيت و ما حدا يقبل يشغلني لانو شكلي ما مناثب...
ايمان:تعبتي على حالك بالدراسة بس ما تعبتي على حالك لتغيري شكلك ،رح كون معك صريحة لانو انا رفيقتك و بحبك ،انت لازم تنفضي حالك من الالف للياء ..
جميلة:ضحكتيني شو يعني روح عند جويل او اعمل عمليات تجميل....
ايمان:لا ما عم قلك روحي عندا ،مثلا لازم داومي بنادي رياضة حتى تنحفي و توصلي للوزن المقبول و قيمي هالنظارات الطبية و حطي عدسات او صححي نظرك بالليزر و قيمي هالتقويم من اسنانك و روحي عند كوافيرة تزبطلك شعرك و شغلات كتير فيكي تعمليها بتساعدك بتغيير شكلك و حتى طريقة لبسك كلها غلط ،الوان غامقة و ما في ذوق و تناسق بالالوان و اهم اهم شغلة و قبل ما تعملي كل هالشي لازم تشوفي حالك انك حلوة و تقيمي هالافكار من راسك انو انا بشعة و ما رح اتوظف و ما رح اتجوز و حظي قليل ،اطردي هالافكار السلبية من راسك لانو انت بهالطريقة بتعملي جذب لكل شي سلبي و بتقضي حياتك هيك....
جميلة :عم تحكي و كانو الامور ببثاطة و بتثير بكبثة زر..
ايمان:لا طبعا ما بكبسة زر ،كلو بدو تعب و وقت بس ما تتغيري كرمال هدف، كرمال وظيفة او عريس ،تغيري كرمال حالك حتى تحسي بالرضا عن نفسك ....
جميلة:يعني اذا نحفت حالي و عملت متل ما عم تقولي ،بصيرو بقبلوني بشي وظيفة او بيطلع حدا بوجهي و بينعجب فيني ...
ايمان:لا ما بالضرورة بجوز ضلك قاعدة بوجهي و بوجه اهلك ههههههه عم امزح، رح اعطيكي مثال اذا حدا قدملك صحنين اكل ،الصحن الاول مكلف اكتر من التاني بس التاني مزين اكتر و بيفتح النفس على الاكل اي واحد بتاكلي ؟..
جميلة :باكل الاتنين ..
ايمان: بتاكلي الاتنين !! اه بتاكلين و بتاكليني معن لعنت ام الحكمة يلي بدي قدملك اياها ،طيب تفائلي خير بس انت ما بشعة حتى لو ما غيرتي بحالك و هالشي لازم تقتنعي فيه حتى تقدري تقنعي الناس يلي بشوفوكي لانو الثقة بالنفس متل الضو بينعكس على المظهر الخارجي و بيعطي رونق و جاذبية و كل الناس بتقدر تشوفو و تميزو عن الغرور ...
جميلة: اممم بفهم منك انا ما عندي ثقة بحالي ...
ايمان : اي تماما و لازم تشتغلي على هالموضوع و هالشغلات ما بدا دورات و صف حكي و كلام ،بدا ارادة و عزيمة و ايمان ...
جميلة :قولي ايمان موجودة و عندي اياها هههههه بث بضل العزيمة و الارادة ...
ايمان: عم ضحكك انا عم احكي كل هالحكي و انت اخدة الامور مسخرة ...
جميلة : لا ولله ما مثخرة ،خلص رح اعمل متل ما عم تحكي ،ايمت بدك نبلش انا جاهزة بث هالشي بدو ميزانية كبيرة.....
ايمان: اي طبعا ،خدي من اخوكي او ابوكي و يعتبرن دين عليكي لتتوظفي بترجعين ، شو بكرا بمر عليكي لنبلش برحلة التغيير؟
جميلة: ماشي ناطرتك ...
الجزء التالت:
مرت علي تاني يوم ايمان و رحنا على نادي الرياضة و قعدنا مع المدربة يلي فيه و كان جسما مثالي متل الموديلز ،قلتلي وقفي لشوف جسمك و وقفت و انا خجلانة ،قلتلي صحتك بمنطقة الورك بس ما تاكلي هم في عنا تمارين رياضية و الات مختصة لتنحف هيك مناطق بالجسم ،قلتلا انا بشوف جسمي غير متناسق ،قلتلي انت جيتي للمكان الصح يلي رح تطلعي منو و رضيانة عن حالك و جسمك بس بدك تلتزمي بالنادي و بالدوام ،قلتلا اكيد انشالله رح التزم بس انا قصيرة ما في شي عنكن بيطول شوي ،قلتلي لا انت ما كتير قصيرة بس طريقة جسمك الحاليةو صحتك مبينتك قصيرة كتير و بكرا انشالله بس ننحت جسمك متل ما بدنا رح تتفاجئي بانو طولك مقبول ،اتفقت على مواعيد النادي و بعدا رحنا عند الكوافيرة شافت شعري و قلتلي بدنا نعملك كيراتين لشعرك لانو مجعد كتير و بدي اصبغلك اياه لون بني فاتح لانو هاللون بيعطي نضارة للوجه و انت لون بشرتك حنطي و رح يطلع حلو كتير عليه ، و اما حواجبك رسمتن ابدا ما لابقة لعيونك ،هلأ ما تقربي علين ،بعد عشرين يوم انا برجع برسملك اياهن ،قلتلا طيب انت كوفيرة شو في ماسكات للبشرة بتعطي نضارة،قلتلي في عنا هون بالمركز مختصين لهيك شي،قلتلا صراحة انا ما جاهزة ماديا هلأ ،قلتلي ايه فهمت عليكي فيكي تستخدمي ماء الورد على وجهك قبل ماتنامي ....
بعد 3ساعات طلعت من عند الكوفيرة و حسيت حالي انسانة تانية مع انو بس شعري يلي تغير ،رجعت على البيت و انا مبسوطة بحالي و شافوني اهلي و قلولي لازم من زمان تعمليه لشعرك .....
تاني يوم رحنا عند دكتور العيون و عملت فحوصات و حددلي موعد لعملية تصحيح النظر و بعدا رحت عند دكتور الاسنان و قلي اذا بتحبي بعملك الابتسامة الهوليودية بجلستين بس بعد ما قملك التقويم بعد شهرين ، و بعد اسبوع عملت عملية الليزر و ودعت النظارات الطبية وبعد 4شهور مع التزامي بالنادي صرت انسانة تانية وما تخيلت انو شوف حالي على المراية بلا نظارات طبية و بلا تقويم اسنان و اهم شي بلا اوراك يلي كانو عامليني عقدة و رحت على السوق انا و ايمان لاشتري تياب لانو كل تيابي القديمة صارت واسعة علي و لانو كمان ايمان قلتلي كل تيابك يلي بالخزانة للكب لانو ما في تناسق بالالوان و ما في ذوق فين ،اول ما فتت وقع عيني على بنطلون اسود و بلوزة زرقا ،و كنت رايحة قيسن بس اجت ايمان و شافتني قبل ما فوت قيسن
ايمان : شوووو هادا بنطلون اسود رجعيه فورا ،انسيلي الاسود من قائمة الالوان ،بعدك صغيرة لاحقة تلبسي اسود و بعدين ما بتعرفي انو في الوان بتعمل اكتئاب و عدم ارتياح ل يلي بلبسا و يلي بشوفك لابستيا ،مشي معي لقلك ،خدي هدول حلوين...
جميلة :مثتحيل ،بنطلون ابيض و بلوزة زهر متل تياب باربي شو مفكرتيني بنت صغيرة ...
ايمان:خلص ما بدي اسمع ولا تعليق منك ،التياب يلي عم تختاريها انت عم تعطيك عمر اكبر و انت بعدك بالعشرينات، و امسكي قيسي هالفستان...
جميلة:فثتان لا ،فثتان لا ،انا ما بحياتي جربت البث فثتان،ما بعرف امشي فيه بخاف اتفشكل و بعدين ما معروف شو لونو مدري موف مدري زهر ..
ايمان : لونو حلو و يلي صممو عارف انو هالالوان بتروح مع بعضا ،و بعدين ما رح تتفشكلي ، ما ضيق كتير، بالعكس رح ترتاحي كتير فيه و الفستان بيعطي انوثة للبنت ،قد ما لبسنا نحن النسوان بناطلين مرجوعنا للفساتين ...واو ليكي هالتنورة البيضا الطويلة الشيفون بتاخد العقل بتطلع عليكي ...
جميلة :يبعتلك حمى يا ايمان ،انا بدي اطلع بهالتياب بالشارع ...
ايمان:لا البسين و اتفتلي فين بالبيت ،طول عمرك طشمة كيف جبتي معدل ممتاز جدا ما بعرف ،مشي نشوف قسم الاكسسوارات و الميك اب ،ليكي انت عيونك صغيرة ما بيطلع قلم الكحلة الاسود حلو عليكي ،بصغر عيونك اكتر ،هيك مرة قرأت بمجلة ،لهيك خدي هالقلم الازرق و الاخضر و ايلاينر اسود فوق العين بيطلع حلو و بكبر عيونك و شوية شادو بني مع بلاشر اورانج و روج دفلي غامق بيلبق لبشرتك . ...
جميلة :انا ما بعرف ارثم ايلاينر و لا حتى حط مثكرة بطلع بعدين متل دب الباندا ..
ايمان: لك كيف دارسة هندسة معمارية و خط ايلاينر ما بتعرفي ترسمي فوق العين ...
جميلة :هاي غير هاي ،كل يلي درستو بالهندسة اسهل عندي من رسم خط فوق العين..
ايمان :انا بعلمك ،و انت رح تحطي ميك اب ناعم لانو المكياج الناعم بيعطي انوثة اكتر و بصغرك بالعمر ...
جملية :بدي حط كل هدول و لثا بتقولي مكياج ناعم ..
ايمان :اي ناعم لانو انت رح تحطي شوي من كل هالشغلات، ما عم قلك ادهني و معجني حالك متل بنات هالايام ،بتحسي يلي ماشي مكياج مع شوية بنت ، يعني مثلا الروج حطي منو شوي بس ليعطي لون للشفايف ..
جميلة :اممم فهمتي عليكي ...خلصنا هلأ
ايمان :لسا بقا الكعب العالي ...
جميلة :ما بعرف امشي بالكعب العالي..
ايمان : بكرا بتتعودي ،لك انا عم اعملك انثى عم قلك كيف بتكوني جميلة الانثى و انت مصرة ضلي جعفر...
رجعت من السوق و انا شارية شغلات كتير تياب و اكسسوارات و مكياج و تاني يوم اجت ايمان لتعلمني كيف حط ميك اب لاول مرة بحياتي و قعدت ساعتين تعلمني شوي و تبهدلني شوي لانو عذبتا كتير بس بعدين طلعت بنتيجة حلوة و انا ما بقا عرفت حالي و لبست من التياب يلي اشتريتن و طلعت لعند امي لفرجيا حالي بعد التحديثات يلي عملتا على شكلي ،شافتني الماما وما عرفتني و قالتلي اهلين خالتو انت رفيقتا لايمان ،صرنا نضحك انا و ايمان و قلتلا لك انا بنتك جميلة قلتلي يخرب بيت شيطانك شو عاملة بحالك ولله ما عرفتك لك طلعتي حلوة و جميلة و نحن ما منعرف ، قلتلا انا من يوم يومي حلوة بث هلأ عملت نيو لوك ....#بقلم_هلاغرابلي
انا غيرت بشكلي شغلات بسيطة بس هالشغلات اعطتني شعور بالرضا عن حالي و حسيت حالي فعلا انو انا بنت جذابة و الشغلات يلي كنت شوفا بشعة بلشت شوفا حلوة و خاصة شفايفي الكبار كنت شوفن ما حلوين و تمنيت كتير لو عندي تم صغير بس هلأ بالعكس صرت بشوفن احلى شي فيني و خاصة انو مقاييس الجمال تغيرت بوقتنا الحالي و صارت الناس عم تنفخ شفايفا بالسيليكون لتعطي الحجم الكبير و وجهي ناعم و جذاب ما ضروري يكون وجهي مليان خدود حتى كون حلوةو طولي صار مناسب بعد ما تعبت على حالي و نحفت و حتى القرطة يلي عندي و كانت زاعجتني بلشت حسا انو حلوة و في ناس كتير بتلدغ و بتقرط و هالشي ما اثر على ثقتا بنفسا و مشوار حياتا ،اقتنعت انو جمالي مميز بس كنت انسانة كسولة و ما عملت اي جهد لابرز هالجمال بطرق بسيطة و ما اهتميت بحالي و بنفسي قد ما اهتميت بتحصيلي العلمي و الحياة بدا توازن و بدا تعطي كل شي حقه حتى نعيش مبسوطين ....
بعد 5شهور رحت لقدم على مسابقة عمل بس هالمرة رحت انا و واثقة من حالي ما بس لانو غيرت بحالي و ما بس لانو معدلي ممتاز ، لانوالشخصية القوية و الثقة بالنفس لازم تكون موجودة عندك لما بدك تقدمي على اي عمل لانو المدير بيختار موظفينه على شخصيتن ما بس على كفاءة و معدل ، كنت متفائلة انو هالوظيفة رح تكون من نصيبي ،وقفت بالممر انا و مجموعة من الشباب و الصبايا ناطرين لنفوت على القاعة و نقدم الاختبار الكتابي
اجا شب لعندي
...مرحبا...
جميلة :اهلين..
...انا اسمي احمد ..
جميلة :تشرفنا و انا اثمي جميلة ...
احمد: هاي اول مسابقة عمل بتقدمي عليا..
جميلة :لا ،مقدمة من قبل بث ما حالفني الحظ و انت ؟
احمد: انا هاي اول مرة بقدم لانو كنت مسافر و من كام شهر جيت على البلد ،انشالله هالمرة تزبط معك انت ايمت تخرجتي ؟
جميلة :تخرجت من زمان تقريبا من 6ثنين و انت ؟
احمد: معناتا انا تخرجت قبلك بسنة ، بس شي غريب نحن الاتنين بنفس الكلية و تقريبا نفس الدفعة و ما شفنا بعض ولا مرة ...
جميلة: اي فعلا و لا انا ما بتذكر انو شايفتك من قبل ..
احمد :على كل حال فرصة سعيدة و بتمنالك التوفيق انشالله
جميلة : تسلم كلك ذوق و موفق انت كمان
فتنا قدمنا الاختبار الكتابي و قعد احمد وراي و بعد ما خلصنا و طلعنا ،لحقني و وقف معي و سالني كيف قدمت و شو جاوبت عن الاسئلة و بعدا رجعت على البيت و حكيت ايمان و قلتلا تعي فورا لعندي.. #بقلم_هلاغرابلي
جميلة : ايمان ما رح تصدقي شو صار معي اليوم، اجا شب وقف معي و ثالني عن اثمي و ايمت تخرجت..
ايمان: هلأ جبتيني من بيتي بسرعة البرق لتقليلي هالحكي ،عادي يعني ،انت بنت حلوة و كتير لقدام رح تتعرضي لهيك مواقف بس ما تعطي عين لاي حدا ...
جميلة: هاي اول مرة شب بيحكي معي و الشب اثمو احمد و من كليتنا بس انا ما عرفتو...
ايمان: كيف شكلو ؟..
جميلة :كتير حلو ، اثمر فاتح و طويل و نحيف بس ما كتير يعني نحيف و لون عيونو عثلي فاتح و لون شعرو اثود ..
ايمان: اي اي عرفتو احمد.... بس هيدا سمعت سافر لعند اخوه على قطر ..
جميلة:اي اي قلي كان مثافر و من فترة رجع لهون ،بث انت كيف عرفتيه و انا ما عرفتو ؟
ايمان: عرفتو لانو كان رفيق اخي و كان يجي عنا احيانا ..
جميلة :يااا عنجد اساليلي اخوكي عنو ...
ايمان : وليه هبولة شو بدي اسالو عنو ،شو الشب اجا يطلبك من اهلك حتى تسالي عنو ..
جميلة :اي صح معك حق بس كتير جنتل و محترم..
بعد شهر طلعت نتيجة الاختبار الكتابي و نحجت فيه و شفت احمد هنيك كان عم يشوف نتيجته و طلع ناجح كمان و بعد عشرة ايام دقولي و اعطوني موعد المقابلة و رحت و شفت احمد كمان و اول ما شافني قلي بس نخلص من المقابلة انطريني ما تروحي لانو انا عازمك على فنجان قهوة لانو شكلنا رح نصير زملاء عمل انشالله...#بقلم_هلاغرابلي
بعد شهر طلع قرار قبولي و تعييني بالوظيفة و حسيت الدنيا بلشت تضحكلي بعد كل هالسنين يلي قضيتن بالقهر و الزعل و الندب على حظي و رحت استلم الوظيفة و انا عم ادعي انو احمد يكون انقبل كمان و اول ما وصلت على المكتب ،شفتو ناطرني
احمد: مبروك عليكي و علي الوظيفة الجديدة ،بدي الحلوان من اول راتب..
جميلة: انت شو عرفك انو انقبلت و بعدين انت كمان اتعينت بدك تلبثني حق الحلوان لحالي كلو ...
احمد: رح كون اكرم منك و جيب الحلوان قبلك و اما كيف عرفت انو انقبلتي هالشي سر ..
جميلة : شكلو عندك معارف بالشركة بس ماتكون معك واثطة ..
احمد: هههههه اي طبعا انا تعينت هون واسطة و لولا واسطتي انت كمان ما كنت تعينتي معي....
جميلة : هههههههه شكرا كتير الك اثتاذ احمد و لواثطك ...
احمد: حدا قلك من قبل انو قرطتك حلوة، يعني ما بس انت حلوة و حكيك حلو ،بحس حالي مشدود الك لاسمعك اكتر و اكتر ،بستمتع كتير و انا عم اسمعك ..
جميلة: هلأ عم تتمثخر علي و بعدين نحن زملاء عمل و هيدا اول يوم ما في داعي لكل هالغزل ...
احمد:لا ولله ما عم اتمسخر عليكي ،فهمتيني غلط انا فعلا بحب طريقة حكيك و بعتذر اذا حكيت حكي دايقك و هاي رح اعمل انسحاب تكتيكي لمكتبي ...
بلشت حب حياتي من جديد و كل يوم كان احلى من يلي قبلو ،اعجابي باحمد ما ضل اعجاب و تحول لحب كبير و هالحب توجناه بالحلال و خطبنا و تزوجنا و بلشنا نعمل عيلة ....
الارادة و العزيمة هي يلي ما بتخلي شي اسمو مستحيل و انا كنت قول مستحيل حب نفسي و ارضى عن شكلي و حتى مستحيل لاقي حدا يحبني و يتزوجني و يعمل معي عيلة لانو انا كنت اخدة صورة عن حالي اني انا بشعة ما كنت فكر الا بالافكار السلبية عن نفسي بس هلأ انا بارادتي و عزيمتي تغيرت من جوا قبل ما اتغير من برا و و قت بلشت شوف الامور بطريقة ايجابية و انو انا انسانة حلوة و بستحق عيش حياتي متل ما بدي و اختلافي عن غيري ما معناه انو انا قل منن هالشي غير مسار حياتي للافضل .
انتهت. .
#انت_كما_ترى_نفسك_بقلم_هلاغرابلي
