الجزء الاول
يا حياة.. لا تكوني بخيلة كالفرح !
كوني سخيّة كالحزن
كالانتظار.. كالشّتاء .. وتعالي ولو لمرّة ملء الحقيقة..
فقد سئمت أشباه الأشياء فيك(محمود درويش)
لبست قميصي و قلتلها شو دكتورة طمنيني ؟؟؟!قلتلي مابعرف شو بدي قلك الكتلة واضحة بصدرك بس منقول انشالله بتكون حميدة وما رح يبين قبل ما ناخد خزعة و بفضل تكون بالمشفى لهيك برايي ترجعي اليوم على بيتك و تخبري اهلك و زوجك و ايمت ما حسيتي حالك جاهزة دقيلي لنحدد موعد لناخد الخزعة قلتلها ماشي منبقى على تواصل و اذا طلعت خبيث.....؟؟؟قاطعتني و قلتلي انشالله لا انشالله لا تفائلي خير .....
طلعت من العيادة و انا عقلي ما معي خايفة و متوترة و مخنوقة كل همي كان اولادي لين و جنى.....اذا امن صرلا شي شو بدو يصير فين كانت هالفكرة هي يلي دابحتني اكتر من مرضي و مين بدي خبر مستحيل خبر امي قلبها ضعيف ما رح تتحمل قلها انو بجوز بنتك معها سرطان لهيك قررت خبر اختي يلي كانت اصغر مني و كانت اختي و رفيقتي بنفس الوقت و زوجي احمد الانسان يلي انا بستمد قوتي منه .......#hla_gharabli
بتذكر هداك اليوم مشيت 3ساعات بالشوارع امشي بالشارع مرتين و تلاتة و اقطع الشارع بدون ما انتبه عالسيارات يلي كانت تزمرلي و يقلولي شبك مجنونة اطلعي على يمينك و شمالك قبل ما تقطعي ..... كان اليوم عم يمشي ببطئ عم حس بكل دقيقة و كل ساعة فيه عم حس بكل نفس عم اتنفسه لانو ممكن ما بقا اتنفسه.....
ما في اصعب من انك تعيش على اعصابك و تنطر تسمع جملة مفصلية بحياتك يا بتفرحك يا بتكسرك يا بتابع حياتك من وقت ما وقفت يا بتفوت بمرحلة جديدة بتحس فيها انو الدنيا ظلمتك و قسيت عليك و اساءت اختيارها الك و بتعاتبا و بتسالا ليش انااا اخترتيني ليش ما غيري و ليش بهالتوقيت بالذات بعد ما هديتيني رجال بجنن بطيبته و حنيته و بنتين ما بتخيل حالي انو اتركن من نص الطريق بس الدنيا ما خلتني محتارة واعطتني الجواب مع الايام .......
وصلت عالبيت و دقيت لاختي رغد و قلتلها انت و راجعة من وظيفتك مري علي نشرب قهوة ....قلتلي يلا ساعة و بخلص و بعد ساعة اجت بس ما خبرتا فورا كنت ناطرة زوجي ليرجع من شغله لخبرن الاتنين سوا لانو ما كنت بتحمل احكي مرتين او شوف ملامح الخوف على وجوهن على دفعتين خبرتن بصوت عم يرجف و مخنوق و بعد ما خلصت حكيي حسيت حمل تقيل نزل عن ضهري كان جوابن بانو اي يلا حكي الدكتورة هلا و قليلا بكرا مننزل عالمشفى الصبح كانت اختي رغد شخصية قوية كتير يلي بشوف ردة فعلها بقول كانو قلتلا بدي انزل عالمشفى اعمل عملية تجميل او يمكن هي شاطرة بالتحكم باعصابها و ملامح وجها اما زوجي احمد كان ما بقل عن رغد بالقوة و روحه المرحة و حكياته يلي بتخليني اضحك بكل المواقف......
نزلنا تاني يوم عالمشفى و اخدت الدكتورة خزعة و قلتلي بدها يومين لتبين النتيجة بدي اياك تكوني قوية متل اختك و زوجك و تتفائلي بالخير و بعد يومين من القلق و الانتظار و التفكير يلي سرق النوم من عيوني دقتلي الدكتورة و قلتلي مري علي عالعيادة و جيبي معك اختك و زوجك قلتلها دكتورة خبريني شو النتيجة قلتلي لتجي منحكي...
الجزء التاني:(للقلوب القوية فقط)
كانت مسرعة لدرجة تفوق المنطق بشهوتها للموت الذي كان يوّد ألتهامها ،ويجّمل لها كم هو مريح وهانىء ...
يهبها متعة الخيال افتحي يديكي واعبري ضجيج الحياة، وتعالي سكون الموت في عمق المحيط سكينة لكي ....
اقذفي جسدك حراً في الفضاء و تلّمسي هدوء أنفاسك التي تخالف اضطراب قلبك، افتحي عينيك للأبيض وسلّمي روحك للموت فهو أمينٌ عليها #taghrid_gharabli.....
حكيت اختي و زوجي ورحنا عند الدكتورة....كان الطريق كتيرر طويل عم امشي و امشي بس ما عم وصل كل خطوة كنت حسها عشر خطوات و قلبي يدق بسرعة و نفسي عم اخده بصعوبة حسيت حالي رح موت عالطريق قبل ما وصل و اعرف النتيجة ......
فتت عند الدكتورة و سالتا فورا شو؟قلتلي ما بعرف شو بدي قلك انت معك سرطان الثدي بالمرحلة التانية و رح نعملك العملية باسرع وقت ممكن لتبلشي بمرحلة العلاج..... يمكن اي وحدة بمكاني بتسالها عن العملية و ايمت بقدر بلش العلاج بس انا سالتها اديش معي وقت؟؟! الوقت هو كان اكبر همي اديش معي وقت ل لحق اشبع من عيلتي و امن عليهن اديش معي وقت لاقعد مع حالي و صلح اخطائي و استغفر ربي قلتلي لازم تكوني قوية و تسالي عن العلاج انت ما اول وحدة بيطلع معها هالمرض و ناس كتير شفيت منه تماما من خلال ايمانها بربها انو هو وحده قادر يشفيها و ثانيا بالتزامها بالعلاج الكيماوي وقدرت انو تابع حياتها و طلعت من هالتجربة بشخصية اقوى و انا هيك بدي منك و انت ما لوحدك هاي زوجك و اختك و كل يلي بحبوكي رح يدعموكي لتمري من هالتجربة بخير و سلام.....#hla_gharabli
كلام دكتورتي اعطاني دفعة امل كبيرة لبلش بمرحلة علاجي بالكيماوي يلي بلشت فيه بعد عملية استئصال الثدي ...العلاج الكيماوي ما كان ابدا بيشبه شي اسمه العلاج لانو العلاج بريح و بيشفي الا هيدا النوع من العلاج يلي كان يموتني الف موتة بكل مرة وجع و الم بالروح قبل الجسم و كنت روح على طول مع اختي او زوجي لمرة شفت بنت صغيرة عمرها عشر سنين بس كانت ناطرة دورها بالعلاج هالبنت يلي بعمر الورد يلي مفروض تكون على مقعد المدرسة و يلي مفروض تعيش طفولتها بالحدايق عم تلعب مع رفقاتها هي موجودة هون بالمشفى و بهالقسم .... وجه بريء ملامح ناعمة عيون ممزوجة من التعب و الحزن و الامل جسم هزيل بس ارادة قوية حسيت حالي انسانة ضعيفة قدام هالطفلة يلي كانت اقوى مني و باين عليها علامات الرضا بقضاء الله و قدره ......
كنت ارجع من المشفى تعبانة و كانو كنت بسباق ماراتون او كنت عم اتسلق جبال عالية و قلها لاختي ما بقا قادرة كمل خلص تعبت تقلي لا مو على كيفك بدك تتابعي علاجك و طيبي لترجعي لبيتك و زوجك و اولادك يلي بعدن بحاجتك قلتلا رغد بدي اطلب منك طلب قلتلي هاتي لنشوف يا مدللة قلتلا بدي تتزوجي احمد بعد ما موت طلعت فيني و قلتلي اوعا تحكي هالحكي مرة تانية انت ما رح تموتي فهمانة ما رح تموتي قلتلا بعرف الفكرة صعبة بس انا ما بامن على اولادي الا معك و احمد اول عن اخر بده يتزوج بعدي احسن ما يتزوج وحدة تكون ظالمة و قاسية علين انت بضلي خالتن و متل امن......قلتلي خلص ما بقا تكفي ما بدي اسمع اذا بتفتحي هالموضوع مرة تانية ما بقا بتشوفي وجهي بحياتك و طلعت من الغرفة مزعوجة......#hla_gharabli
بس انا الفكرة ما شلتا من راسي و خاصة بعد ما بلشت اثار العلاج تبين على مظهري وصحتي و شعري يلي بلشت اخسره رغم انو كانت الفكرة عم تدبحني بس بلشت اشتغل عليها و حاولت الفت نظر زوجي لاختي و مرة طلبت منها تنام عندي و اعطيتا قميص نوم من عندي و تاني يوم الصبح فقت قبلها و طلعت عالمطبخ و فطرت انا و زوجي و قلتله فيك تجبلي حبة مسكن من الغرفة قلي اختك نايمة قلتله لا فاقت و غيرت تيابها كمان و بعد شوي رجع زوجي وجهه احمر قلي كيف بتحطيني بهيك موقف محرج مع اختك فتت عليها و بعدها بقميص النوم قلتله ييي تركتا فايقة و قالت بدا تبدل تيابها ......
كنت ما اترك فرصة الا و استغلها لقربن من بعض احيانا كنت اتركن مع بعض و فوت نام او اطلب منن يروحو يطلعو الاولاد مشوار كل هالشي عملته و انا عم احترق من جوا بس مضطرة ما لازم كون انانية و ما امن على اولادي بوحدة تحبن و متاكدة انو خالتن ما رح تظلمن و هي كمان رح تعيش مبسوطة مع احمد يلي اي بنت بالعالم بتتمنى تكون مرته.........
الجزء التالت:
أن تموت دفعة واحدة فأنك تنجو من هذه الحياة بأعجوبة ولكن أن تموت بالأجزاء فأنك تختبر وجع الموت الحقيقي ، يبدأ الموت بأغتيال ضحكتك ويهبك خدعة الموت المريح يسمح لك أن تودع هذا العالم ع عجل ، طالب أنت منه أن يعّجل في مهمته #taghrid_gharabli
كل المحاولات و الطرق يلي جربتها لقرب زوجي من اختي باءت بالفشل حتى اختي واجهتني و قلتلي انا فهمانة عليكي شو عم تعملي لهيك ما بقا تحاولي و ركزي اهتمامك على صحتك و اولادك اكتر .....
مرة كنت قاعدة عم راقب اولادي و هنا عم يلعبو و عم ملي عيوني منن معقول اولادي يصيرو ايتام بعد كام شهر معقول يكبرو و ينسوني و ينسو صورة وجهي كان نفسي شوف لين و هي لابسة الابيض و زفها لعريسها كان نفسي شوف جنى و هي متخرجة من جامعتها كان نفسي شوف اولادن و العب معن افكار كتير حلوة بس بالنسبة الي كانت تعبني كتير... فتحت تلفزيون لاتفرج على شي التهي فيه عن هالافكار يلي عم تاكلني و بالصدفة كان طالع برنامج حديث للنقاش جذبني كتير موضوعه و القصص يلي حكوها ضيوفه قصص واقعية صارت بزمان و مكان كانت القصص عم تحكي عن ناس كانت مريضة و وصلت لحافة الموت و باللحظة الاخيرة رجعو للحياة كنت عم اسمع القصة و عم قول معقول انا صير منن و يجي يوم و اكتب قصتي بس رغم كل هالافكار كان عندي امل كبير و يقين بربي انو فترة و رح تعدي بحياتي.... #hla_gharabli
نصتت منيح للبرنامج يلي كان عنوان حلقته داوو مرضاكم بالصدقة و حتى بعد ما خلص رجعت فتحته عالنت لاسمعه على راحتي و اسمع قصص ضيوفه و بعد ما خلصت الحلقة اخدت قراري و نطرت زوجي ليرجع لخبره و اول ما اجا قلتله بدي احكي معك بموضوع قلي تفضلي قلتله بدي اتبنى طفل يتيم قلي ششو !!شو طلع براسك على بالك تربي ولد منرجع منجيب ولد لجنى و لين قلتله لا ما هيدا قصدي انا بدي اتبنى ما بدي احبل و خلف قلي ليش شو السبب؟؟حكتله عن البرنامج و القصص يلي سمعتها و قلي هيدي مسؤولية كبيرة و تعب عليكي قلتله بكل الاحوال عم تجي وحدة هي يلي عم تشتغل البيت و تطبخ ما عم تعب حاالي بشي قلي طيب منكفله ماديا بس ما منتبناه قلتله لا بدي اتبناه و يعيش معنا و يحس بجو الاسرة ......
رحنا تاني يوم على ملجأ للايتام و حكينا المديرة يلي اخدتنا جولة نتعرف على الميتم و الاطفال يلي بعمر ال6سنين شفت صبي كئيب و منعزل بزاوية لحاله وما عم يلعب مع باقي الاولاد قلتلها لمديرة الميتم هالصبي شو وضعه ليش منعزل عن رفقاته قلتلي هيدا اسمه محمد جابولنا اياه من ريف الشام ابوه و امه و اخواته كلن راحو بقذيفة و من وقت ما جابوه من شهرين و هو على هالوضع مع انو حاولنا نتقرب منه كتير بس ما استفدنا و معظم الاطفال يلي هون هن ضحايا الحرب يلي يتمت اطفال كتير بس هيدا حالة استثنائية.... قربت لعنده و نزلت لمستوى حجمه الضئيل و سالته عن اسمه كان جسمه هزيل و ايديه ناعمين كتير و مبين اصغر من عمره اما وجهه الصغير شفت فيه وجع و معاناة حرب 3سنين اول ما شفته حبيته كتير و زاد اصراري على هالخطوة و بلشنا فورا بمعاملة التبني .......
بعد ما تبنيت محمد يلي حسيته متل ابني ب 4شهور بس لحمدلله انا رجعتلي صحتي و خلصت من مرض السرطان يلي طلعت منه انسانة اقوى و طلعت منه بطفل كان بحاجة اسرة حاضنة و جو دافي حتى الدكتورة تفاجات و قلتلي شو عملتي حتى جسمك تعافى و تفاعل مع العلاج بهالسرعة.....
و هلا بعد 3سنين بسال حالي سؤال واحد انا تعافيت بسرعة لاني تبنيت طفل يتيم حالته النفسية كانت جدا سيئة او انا مرضت لاتبنى هالطفل اليتيم يلي كان بحاجة عيلة ؟؟؟؟!!
انتهت.
ملاحظة :للتوضيح التبني محرم بس انا بقصد هون بالتبني هو تبني معنوي و مادي بدون ما يتسجل الطفل على اسم الناس يلي ضموه لعيلتن و لانو الطفل هون معروفة مين عيلته و نسبه.
لا يوجد تعليقات
أضف تعليق